ភ្នំពេញ៖ថ្ងៃចន្ទ ៨កើត ខែបុស្ស ឆ្នាំឆ្លូវ ត្រីសក័ ពុទ្ធសរាជ២៥៦៥ ត្រូវនឹងថ្ងៃទី១០ ខែមករា ឆ្នាំ២០២២
ភ្ញៀវទេសចរផ្ទៃក្នុងនាចុងសប្តាហ៍ ចាប់ពីថ្ងៃទី០៧ ដល់ថ្ងៃទី០៩ ខែមករា ឆ្នាំ២០២២ ដោយទទួលបានភ្ញៀវទេសចរសរុបចំនួន៤៥៦,៣៣៤នាក់ មានការកើនឡើងប្រមាណ ១៨៥.២៨ភាគរយ ធៀបនឹងរយៈពេលដូចគ្នានៃឆ្នាំ២០២១។
ឯកឧត្ដម ថោង ខុន រដ្ឋមន្ត្រីក្រសួងទេសចរណ៍ បានបង្ហាញពីស្ថិតិភ្ញៀវទេសចរផ្ទៃក្នុង នាចុងសប្តាហ៍ ចាប់ពីថ្ងៃទី០៧ ដល់ថ្ងៃទី០៩ ខែមករា ឆ្នាំ២០២២ ដោយទទួលបានភ្ញៀវ ទេសចរសរុបចំនួន៤៥៦,៣៣៤នាក់ ក្នុងនោះភ្ញៀវជាតិមានចំនួន៤៤៣,៣៧៨នាក់ និងភ្ញៀវ បរទេសផ្ទៃក្នុង១២,៩៥៦នាក់។
គោលដៅទេសចរណ៍សំខាន់ៗរួមមាន៖ រាជធានីភ្នំពេញ ៨៥,៤៥៨នាក់, ខេត្ត ព្រះសីហនុ ៧០,៦៤៨នាក់, ខេត្តសៀមរាប ៥០,៤៥៥នាក់, ខេត្តពោធិ៍សាត់ ៤៤,២៩១នាក់, ខេត្តបាត់ដំបង ៣៥,៩៥២នាក់, ខេត្តកំពត ៣២,០៤២នាក់។
យោងតាមតួលេខនេះ មានការកើនឡើងប្រមាណ១៨៥.២៨ភាគរយ ធៀបនឹងរយៈ ពេលដូចគ្នានៃឆ្នាំ២០២១ ដោយក្នុងនោះគ្រាន់តែថ្ងៃឈប់សម្រាកទិវាជ័យជម្នះ ៧ មករា មាន ភ្ញៀវសរុបប្រមាណជិត១៦ម៉ឺននាក់ បានដើរកម្សាន្តតាមគោលដៅទេសចរណ៍នានាទូទាំង ប្រទេស។
ចរន្តភ្ញៀវកុះករនាចុងសប្តាហ៍នេះ ជាការបង្កើនក្តីសង្ឃឹមសម្រាប់វិស័យឯកជន និង ពលរដ្ឋដែលប្រកបមុខរបរក្នុងវិស័យទេសចរណ៍ បន្ទាប់ពីពេលឆ្លងឆ្នាំសកលកន្លងមក ដែល មានភ្ញៀវសរុបជាង២លាននាក់ ហើយក៏រំពឹងថានាឱកាសចូលឆ្នាំប្រពៃណីចិន ឆ្នាំ២០២២ ខាងមុខ ពិតជាមានភ្ញៀវទេសចរដើរកម្សាន្តជាច្រើនបន្ថែមទៀតផងដែរ។
ជាមួយចរន្តភ្ញៀវទេសចរនាចុងសប្តាហ៍នេះ ក្រសួងទេសចរណ៍ និងរដ្ឋបាលខេត្តបាន ណែនាំបន្ថែមឱ្យមន្ទីរទេសចរណ៍ សហការជាមួយមន្ទីរសុខាភិបាល និងគោលដៅទេសចរណ៍ ទូទាំងប្រទេសបន្តខិតខំជំរុញអនុវត្តន៍នូវវិធានការ៣កុំ និង៣ការពារ និងវិធានសុវត្ថិភាពទេស ចរណ៍ និងការអនុវត្តន៍SOP ក្នុងការទប់ស្កាត់កូវីដ-១៩ ឱ្យបានជាប់ជាប្រចាំ៕
