លោក ប៉ែន វណ្ណរិទ្ធ ប្រធានមន្ទីរកសិកម្មរុក្ខាប្រមាញ់ និងនេសាទខេត្តកំពង់ធំ បានឱ្យដឹងនៅព្រឹកថ្ងៃអង្គារ ៧កើត ខែមាឃ ឆ្នាំឆ្លូវ ត្រីស័ក ព.ស ២៥៦៥ ត្រូវនឹងថ្ងៃទី០៨ ខែកុម្ភៈ ឆ្នាំ២០២២នេះថា គិតត្រឹមថ្ងៃទី០៧ម្សិលមិញ ប្រជាកសិករខេត្តកំពង់ធំធ្វើការ បង្កបង្កើនផលស្រូវប្រដេញទឹកនិងស្រូវប្រាំងឆ្នាំ ២០២១-២០២២ បានចំនួន៦៥៤២៥ហិកតា ស្មើនឹង១៦៣,៥៦ភាគរយ នៃផែនការ៤០០០០ហិកតា ប្រៀបធៀបរយៈពេលដូចគ្នា នឹងឆ្នាំមុន ទាបជាងចំនួន៧៣៧៩ហិកតា។
គិតត្រឹមរយៈពេលដូចគ្នានេះដែរ ប្រជាកសិករខេត្តកំពង់ធំ ធ្វើការប្រមូលផលស្រូវប្រដេញទឹកនិងស្រូវប្រាំងឆ្នាំ២០២១-២០២២ បានចំនួន ៣៣៦៣២ហិកតា ស្មើនឹង៥១,៤១នៃផ្ទៃដីអនុវត្តន៍ បានដោយទទួលបានទិន្នផលមធ្យម ៤តោន ៤២០គីឡូក្រាម ក្នុង១ហិកតា។លោក ប៉ែន វណ្ណរិទ្ធ បានឱ្យដឹងទៀតថា តម្លៃស្រូវសើមពូជ(៥៤៥១) ថ្លៃចន្លោះពី៨២០ ទៅ៨៣៨រៀលក្នុង១គីឡូក្រាម ស្រូវពូជ(សែនក្រអូប) ថ្លៃចន្លោះពី១០០០ ទៅ១០៥០រៀល ក្នុង១គីឡូក្រាម។ តម្លៃដំឡូងមីស្រស់ថ្លៃចន្លោះពី៣១៥ទៅ៣៣០រៀល ក្នុង១គីឡូក្រាម និងតម្លៃដំឡូងមីគ្រៀមចន្លោះពី៧២០ទៅ៧២៨រៀលក្នុង១គីឡូក្រាម។
លោក ប៉ែន វណ្ណរិទ្ធ បានឱ្យដឹងទៀតថា គិតត្រឹមថ្ងៃទី០៧ ខែកុម្ភៈ ឆ្នាំ២០២២ ប្រជាកសិករខេត្តកំពង់ធំបានដាំដំណាំរួមផ្សំរដូវប្រាំងសរុបចំនួន១៦២៣ហិកតា ខ្ពស់ជាងឆ្នាំ មុនក្នុងរយៈពេលដូចគ្នាចំនួន៩០ហិកតា ក្នុងនោះដំណាំបន្លែចំនួន២០៧ហិកតា ពោត ចំនួន១៣០ហិកតា សណ្ដែកបាយ៦ហិកតា ដំឡូងជ្វាចំនួន៧៧ហិកតា ឪឡឹកចំនួន១១៤៦ហិកតា សណ្ដែកដីចំនួន៤៥ និងដំណាំអំពៅចំនួន១២ហិកតា៕
