ក្រសួងសុខាភិបាលរបស់ប្រទេសឡាវបានប្រកាសកាលពីថ្ងៃទី២២ ខែកុម្ភៈថា ប្រទេសឡាវបានកត់ត្រាករណីឆ្លងថ្មីនៃជំងឺកូវីដ-១៩ ចំនួន ១៤០នាក់ក្នុងរយៈពេល ២៤ម៉ោងកន្លងមកនេះ ដែលជាចំនួនទាបបំផុតក្នុងរយៈពេលប៉ុន្មានខែថ្មីៗនេះ។
យោងតាមក្រសួងសុខាភិបាលនេះបានឱ្យដឹងថា ករណីឆ្លងសរុបនៅទូទាំងប្រទេសបានកើនឡើងដល់ចំនួន ១៤១ ៤៤១នាក់ ដោយមានអ្នកស្លាប់សរុបចំនួន ៦១៣នាក់។
បើទោះបីជាចំនួនករណីឆ្លងថ្មីមានការថយចុះក៏ដោយ ក៏ក្រសួងនេះបានអំពាវនាវឱ្យប្រជាពលរដ្ឋបន្តអនុវត្តតាមវិធានការបង្ការ ជាពិសេសការពាក់ម៉ាស់ លាងដៃឱ្យបានទៀងទាត់ និងរក្សាគម្លាត។
ប្រជាជនត្រូវបានជំរុញឱ្យទៅទទួលការចាក់វ៉ាក់សាំងការពារជំងឺកូវីដ-១៩ ហើយអ្នកដែលធ្វើតេស្តវិជ្ជមានចំពោះជំងឺនេះគួរតែស្វែងរកការជួយពីអ្នកជំនាញផ្នែកវេជ្ជសាស្ត្រ។
ក្រសួងនេះក៏បានព្រមានដល់ប្រជាជនផងដែរចំពោះវីរុសបម្លែងថ្មីអូមីក្រុងដែលមានលទ្ធភាពចម្លងបានលឿនខ្លាំង និងបានស្នើឱ្យពួកគេជៀសវាងពីសកម្មភាពមានមនុស្សច្រើន ដើម្បីទប់ស្កាត់ការឆ្លងរាលដាលនៃជំងឺកូវីដ-១៩៕
