ស្ទឹងត្រែង៖ ប្រជាពលរដ្ឋនៅស្រុកថាឡាបរិវ៉ាត់ជាង៣.៨០០នាក់ បានមកទទួលយកសេវាព្យាបាលជំងឺដោយឥតគិតថ្លៃ ពីក្រុម គ្រូពេទ្យឯកឧត្តម ហ៊ុន ម៉ានី ប្រធានសហភាពសហព័ន្ធយុវជនកម្ពុជា ដែលបានចុះមកដល់មូលដ្ឋានផ្ទាល់ ដើម្បីព្យាបាល ជំងឺទូទៅជូនប្រជាពលរដ្ឋប្រកបដោយការយកចិត្តទុកដាក់។ ក្នុងសកម្មភាពមកទទួលសេវាសុខាភិបាលដោយឥតគិតថ្លៃ នៅថ្ងៃទី០៧ មីនាឆ្នាំ២០២២ នៅវិទ្យាល័យព្រះគោ ភូមិ-ឃុំ-ថាឡា ស្រុកថាឡាបរិវ៉ាត់ ខេត្តស្ទឹងត្រែង លោកយាយ វ៉ាន់លឿង អាយុ៧៤ឆ្នាំ រស់នៅភូមិ-ឃុំថាឡា តំណាងប្រជាពលរដ្ឋមកទទួលយក សេវាសុខាភិបាលនេះ បានបញ្ជាក់ថា៖ បងប្អូនប្រជាពលរដ្ឋសំដែងការពេញចិត្តនិងគាំទ្រផ្នែកសេវាសុខាភិបាលដ៏ល្អប្រសើរនេះ ព្រោះវាជាកិច្ចការងារមនុស្សធម៌បានមកជួយប្រជាពលរដ្ឋដោយឥតរើសអើង ។
លោកស្រីបន្តថា៖ថ្វីដ្បិតតែសកម្មភាពការចុះមកព្យាបាលជំងឺមានរយៈពេលខ្លីក៏ពិតមែន តែបានបង្ហាញនូវកាយវិការដ៏ល្អ និង ស្រឡាញ់ប្រជាពលរដ្ឋយើងមកដល់ទីជនបទដែលធ្វើឱ្យបងប្អូនប្រជាពលរដ្ឋរលឹកនឹកគុណមិនភ្លេច។
លោកវេជ្ជណ្ឌិត លេង ថាលី ប្រធានក្រុមដឹកនាំគ្រូពេទ្យស្ម័គ្រចិត្តឯកឧត្តម ហ៊ុន ម៉ានី បានផ្តល់ប្រឹក្សាជូនបងប្អូនប្រជាពលរដ្ឋ ដែលបានទទួលយកថ្នាំពីគ្រូពេទ្យ ត្រូវយកទៅប្រើប្រាស់ឱ្យបានត្រឹមត្រូវតាមវេជ្ជបញ្ជា ដើម្បីឱ្យការព្យាបាលជំងឺមានប្រសិទ្ធភាព ។
លោ ស៊ី សួន អភិបាលរងខេត្តស្ទឹងត្រែងមានប្រសាសន៍ថា៖នេះជាការយកចិតទុកដាក់ពីរាជរដ្ឋាភិបាល ហើយក្នុងនាម អាជ្ញាធរខេត្ត សូមគាំទ្រចំពោះសកម្មភាពដ៏មានតម្លៃនេះជាពិសេសក្រុមគ្រូពេទ្យ ចំនួន៣០០នាក់ ដដែលបានចំណាយកម្លាំង កាយចិត្ត មកបំពេញកិច្ចការងារមនុស្សធម៌ បម្រើប្រជាពលរដ្ឋបានល្អប្រសើរ។
ឯកឧត្តម ឡូយ សូផាត អ្នកតំណាងរាស្ត្រមណ្ឌលស្ទឹងត្រែងមានប្រសាសន៍ចាក់ទុកថា៖នេះជាវប្បធម៌ សាមគ្គីភាព ឯកភាព ជួយឧបត្ថម្ភគាំទ្រ និងបានខិតខំប្រឹងប្រែងអស់ពីលទ្ធភាព ក្នុងការជួយគ្នាទៅវិញទៅមក ជាពិសេសក្រុមគ្រូពេទ្យសហភាពសហព័ន្ធ យុវជនកម្ពុជា ដែលអនុវត្តយ៉ាងម៉ឹងម៉ាត់នូវគោលនយោបាយរបស់រាជរដ្ឋភិបាល សំដៅចូលរួមជាកម្លាំងចលករមួយក្នុងកិច្ច អភិវឌ្ឍន៍សង្គមជាតិយើង។
សូមបញ្ជាក់ថា៖នេះជាលើកទី២ហើយ នៅដើមឆ្នាំ២០២២នេះ ដែលក្រុមគ្រូពេទ្យស្ម័គ្រចិត្តឯកឧត្តម ហ៊ុន ម៉ានី ប្រធាន សហភាពសហព័ន្ធយុវជនកម្ពុជា បានមកដល់ខេត្តស្ទឹងត្រែងផ្តល់ថ្នាំព្យាបាលជំងឺទូទៅជូនប្រជាពលរដ្ឋ សរុបទាំង២លើក បានជាង៥០០០នាក់៕
