កំពង់ចាម៖នាព្រឹកថ្ងៃ អង្គារ ៦កើត ខែផល្គុន ឆ្នាំឆ្លូវ ត្រីសក័ ពុទ្ធសរាជ ២៥៦៥ ត្រូវនឹងថ្ងៃទី០៨ ខែមីនា ឆ្នាំ២០២២
ឯកឧត្តម អ៊ុន ចាន់ដា អភិបាលនៃគណៈអភិបាលខេត្តកំពង់ចាម និងជា ប្រធានគណៈកម្មាធិការសាខាកាកបាទក្រហមកម្ពុជាកំពង់ចាមបានប្រគល់ផ្ទះមនុស្សធម៌ទី៨ ជូនស្រ្តីមេម៉ាយគ្មានទីពឹងជួបការលំបាក ឈ្មោះ លោកយាយ អ៊ាង មួយហ៊ាង អាយុ៧២ឆ្នាំ ជាស្ត្រីមេម៉ាយជារាគ្មានទីពឹង មានកូនប្រុសស្រី ៣នាក់ ដែលរស់នៅភូមិស្រក ឃុំស្រក ស្រុកកំពង់សៀម ខេត្តកំពង់ចាម។
ឯកឧត្តម អ៊ុន ចាន់ដា បានពាំនាំនូវការផ្ដាំផ្ញើសួរសុខទុក្ខពីសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ដែលជានិច្ចកាលតែងតែយកចិត្តទុកដាក់គិតគូរចំពោះសុខទុក្ខប្រជាពលរដ្ឋគ្រប់រូប មិនប្រកាន់វណ្ណៈ ពណ៌សម្បុរ ជំនឿសាសនា ឬនិន្នាការនយោបាយណាមួយឡើយ និងបានចាត់ឱ្យថ្នាក់ដឹកនាំខេត្តចុះពិនិត្យនិងតាមដានដល់បងប្អូនប្រជាពលរដ្ឋណាដែលជួបការលំបាកត្រូវចុះជួយពួកគាត់ដោយមិនទុក ចោលឡើយស្របតាមទិសស្លោក “កាកបាទក្រហមកម្ពុជា មានគ្រប់ទីកន្លែង សម្រាប់គ្រប់ៗគ្នា មិនទុកនរណាម្នាក់ចោលឡើយ”។
ឯកឧត្តមបានក្រើនរម្លឹកដល់ប្រជាពលរដ្ឋទាំងអស់ ត្រូវបន្ត រស់នៅតាមគន្លងប្រក្រតីភាពថ្មី ក្នុងបរិបទកូវីដ-១៩ដោយម្នាក់ៗ ត្រូវបង្កើនការថែទាំសុខភាព ការពារខ្លួនឱ្យបានជាប្រចាំដោយមិនត្រូវធ្វេសប្រហែស ឬមើលស្រាលជំងឺកូវីដ-១៩ នេះបានឡើយ ។
ក្នងកាល:ទេស:នេះ ទាំងអស់គ្នា ត្រូវអនុវត្ត ឱ្យបានខ្ជាប់ខ្ជួន នូវវិធានសុខាភិបាល “៣ការពារ និង ៣កុំ” ព្រមទាំងជំរុញសាច់ញាតិ បងប្អូន កូនចៅ ឱ្យទៅទទួលការចាក់វ៉ាក់សាំងបង្ការជំងឺកូវីដ១៩ ទាំងដូសមូលដ្ឋាន និងដូសជំរុញឱ្យបានគ្រប់ៗគ្នាដែលជួយឱ្យសហគមន៍មានភាពសាំ និងធ្វើឱ្យសកម្មភាពសេដ្ឋកិច្ច មានចរន្តដំណើរការល្អប្រសើរឡើងវិញ។
សូមជម្រាបជូនថា ផ្ទះមនុស្សធម៌ទី៨គឺធ្វើអំពីឈើខ្ពស់ផុតពីដី ប្រក់ស័ង្កសីភ្លីធំ (ទំហំ៤ម៉ែត្រ គុណ ៦ម៉ែត្រ) ១ខ្នង តម្លៃប្រមាណ ១០ ០០០ ០០០ រៀល ជាថវិកាបដិភាគ របស់សាខា សាលាគណ អនុសាខាស្រុក សាលាអនុគណ ចៅអធិការវត្តទូទាំងស្រុកកំពង់សៀម និងសប្បុរសជន ៕
