ប្រធានមន្ទីរកសិកម្មខេត្តកំពង់ធំថា ការបង្កបង្កើនផលស្រូវប្រដេញទឹក និងស្រូវប្រាំង មានការថយចុះជាងឆ្នាំមុន

លោក ប៉ែន វណ្ណរិទ្ធ ប្រធានមន្ទីរកសិកម្មរុក្ខាប្រមាញ់ និងនេសាទខេត្តកំពង់ធំ បានឱ្យ ដឹងនៅព្រឹកថ្ងៃ ៧កើត ខែផល្គុន ឆ្នាំឆ្លូវ ត្រីស័ក ព.ស ២៥៦៥ ត្រូវនឹងថ្ងៃទី០៩ ខែមីនា ឆ្នាំ២០២២នេះថា ការងារបង្កបង្កើនផលស្រូវប្រដេញទឹក និងស្រូវប្រាំង ឆ្នាំ២០២១-២០២២ បានបញ្ចប់គិតត្រឹមថ្ងៃទី០៩ ខែមីនានេះ ដោយអនុវត្តន៍បានចំនួន៦៥៤៨៨ហិកតា ស្មើនឹង ១៦៣,៧២ភាគរយ នៃផែនការ៤០០០០ហិកតា បើប្រៀបធៀបរយៈពេលដូចគ្នានិងឆ្នាំមុន ទាបជាងចំនួន១១៤៦៨ហិកតា។

លោកបន្តថា គិតត្រឹមថ្ងៃទី០៩ ខែមីនា ឆ្នាំ២០២២នេះដែរ ប្រជាកសិករខេត្តកំពង់ធំ ធ្វើការប្រមូលផលស្រូវប្រដេញទឹកនិងស្រូវប្រាំងឆ្នាំ២០២១-២០២២ បានចំនួន ៥៥៤២២ ហិកតាស្មើនឹង៨៤,៦៣ភាគរយ នៃផ្ទៃដីអនុវត្តន៍បានដោយទទួលបានទិន្នផលមធ្យម ៤តោន ៤៣០គីឡូក្រាម ក្នុង១ហិកតា។

លោក ប៉ែន វណ្ណរិទ្ធ បានឱ្យដឹងទៀតថា តម្លៃស្រូវសើមពូជ(៥៤៥១)ថ្លៃចន្លោះ ពី៨២០ទៅ៨៣៦រៀលក្នុង១គីឡូក្រាម និងពូជ(សែនក្រអូប)ថ្លៃចន្លោះពី ១០៥០ទៅ១០៧៥ រៀលក្នុង១គីឡូក្រាម។ គ្រាប់ស្វាយចន្ទីពូជ(M23)ថ្លៃចន្លោះពី៥០០០ទៅ៥២០០ រៀលក្នុង១គីឡូក្រាម។ តម្លៃដំឡូងមីស្រស់ថ្លៃចន្លោះ ពី២៨០ទៅ៣០០រៀលក្នុង១គីឡូក្រាម និងតម្លៃដំឡូងមីក្រៀមថ្លៃចន្លោះពី៧៥០ទៅ៧៦៨រៀលក្នុង១គីឡូក្រាម។

លោក ប៉ែន វណ្ណរិទ្ធ បានបញ្ជាក់ថា គិតត្រឹមថ្ងៃទី០៩ ខែមីនានេះ ប្រជាកសិករ ខេត្តកំពង់ធំ បានដាំដំណាំរួមផ្សំសរុបបានចំនួន២០២៩ហិកតា៕