ត្បូងឃ្មុំ៖ នាព្រឹកថ្ងៃទី១៥ ខែមីនា ឆ្នាំ២០២២នេះ
គណៈកម្មាធិការគណបក្សប្រជាជនកម្ពុជាខេត្ត បើកកិច្ចប្រជុំបូកសរុបការងារគណបក្សប្រចាំខែកុម្ភៈ និងទិសដៅភារកិច្ចការងារខែមីនា ឆ្នាំ២០២២ នៅមន្ទីរគណបក្សប្រជាជនកម្ពុជាខេត្តត្បូងឃ្មុំ។
កិច្ចប្រជុំនេះប្រព្រឹត្តទៅ ក្រោមអធិបតីភាពឯកឧត្តម ស៊ាក ឡេង ប្រធានគណៈកម្មាធិការគណបក្សខេត្ត និងឯកឧត្តមបណ្ឌិត ជាម ច័ន្ទសោភ័ណ សមាជិកគណៈកម្មាធិការថ្នាក់កណ្តាល និងជាអនុប្រធានគណៈកម្មាធិការគណបក្សខេត្តត្បូងឃ្មុំ ដោយមានការអញ្ជើញចូលរួមពីសំណាក់ ឯកឧត្តម លោកជំទាវ ជាសមាជិក-សមាជិកាគណៈអចិន្ត្រៃយ៍បក្ស គណៈកម្មាធិការបក្សខេត្ត/ស្រុក ជាច្រើនរូប ។
ឯកឧត្តម ពាង ណារិទ្ធ អនុប្រធាន និងជាប្រធានគណៈប្រចាំការគណបក្សខេត្ត បានអានសេចក្តីព្រាងរបាយការណ៍បូកសរុបលទ្ធផលការងារ គណបក្សប្រចាំខែកុម្ភៈ កន្លងទៅ និងទិសដៅភារកិច្ចការងារប្រចាំខែ មីនា ឆ្នាំ២០២២រួចមក សមាជិកក្នុងអង្គប្រជុំ បានបន្តការចូលរួមយោបល់ក្នុងការកែលម្អ នៅរបាយការណ៍ ដើម្បីឲ្យកាន់តែល្អ និងសុីជម្រៅបន្ថែមទៀត។
បន្ទាប់មក ឯកឧត្តម គល់ យ៉ាត សមាជិកគណៈអចិន្រ្តៃយ៍គណបក្សខេត្ត និងជាប្រធានគណៈកម្មាធិការត្រួតពិនិត្យ គណបក្សខេត្ត ក៏បានធ្វើការផ្សព្វផ្សាយនូវរបាយការណ៍បូកសរុបការងារត្រួតពិនិត្យ គណកម្មាធិកាកណ្តាលគណបក្សឆ្នាំ ២០២១ និងទិសដៅភារកិច្ចឆ្នាំ២០២២។
មានប្រសាសន៍នាឱកាសនោះ ឯកឧត្តម ស៊ាក ឡេង បានលើកឡើងថា កិច្ចប្រជុំនេះធ្វើឡើង ដើម្បីបូកសរុបត្រួតពិនិត្យ ពិភាក្សា និងសេចក្តីព្រាងពាក់ព័ន្ធនឹងរបាយការណ៍ ដែលគណបក្សខេត្តខិតខំអនុវត្តន៍សម្រេចបាន ក៏ដូចជាបន្តលើកឡើង នូវទិសដៅក្នុងការអនុវត្តន៍បន្ត ធ្វើយ៉ាងណាអោយលទ្ធផលការងារ កាន់តែមានប្រសិទ្ធភាពល្អបន្ថែមទៀត។
ឯកឧត្តម គូសបញ្ជាក់ថា កិច្ចប្រជុំប្រចាំខែនេះតែងតែត្រូវរៀបចំឡើងរៀងរាល់ខែ ជាទៀងទាត់ ដើម្បីពិនិត្យ ពិភាក្សា បូកសរុបការងារ ប្រចាំខែ ដែលគ្រប់អង្គភាព នីមួយៗ បានអនុវត្ត ទាំងលើការងារប្រចាំថ្ងៃ ការងារកែទម្រង់ និងការងារក្រៅ ដើម្បីធ្វើកំណែទម្រង់ ស្ដាប់បញ្ហាប្រឈម និងសំណូមពរនានា របស់គ្រប់អង្គភាព និងកំណត់ដាក់ទិសដៅអនុវត្តការងារបន្ត។
ឯកឧត្តម ស៊ាក ឡេង បានមានប្រសាសន៏ផ្ដាំផ្ញើ ដល់ សមាជិក-សមាជិកា ទាំងអស់ បន្តជម្រុញការផ្សព្វផ្សាយសមិទ្ធផលរបស់គណបក្ស ពង្រឹងស្មារតីសមាជិកចាស់ បង្កើនសមាជិកថ្មី និងអនុវត្តការងារភារកិច្ចរបស់ខ្លួន អោយបានល្អប្រសើរ ដោយបន្តអប់រំ ផ្សព្វផ្សាយ ឯកសារជំនួយស្មារតី នៅចំណុចសំខាន់ៗ ដែលជាគោលនយោបាយរបស់គណបក្ស ឲ្យទទួលបានប្រសិទ្ធភាពខ្ពស់ និងសូមមានប្រុងប្រយ័ត្នខ្ពស់ ការពារខ្លួនអំពីការឆ្លងរីករាលដាលកូវីដ-១៩ ៕
