កសិករមួយរូប រស់នៅក្នុងស្រុកជីក្រែង ខេត្តសៀមរាប បានចែករំលែកបទពិសោធន៍ លើការងារដាំដុះដំណាំខ្ទឹមបារាំង ឱ្យទទួលបានទិន្នផលខ្ពស់ ខណៈ ដំណាំមួយប្រភេទនេះ ហាក់ពិបាកក្នុងការដាំដុះនិងថែទាំ។
អ្នកស្រី ត្រិក សាម រស់នៅភូមិក្របៅ ឃុំសង្វើយ ស្រុកជីក្រែង ខេត្តសៀមរាប បានឱ្យដឹងថា៖ អ្នកស្រីចាប់យកមុខរបរដាំដុះបន្លែលក់ រយៈពេលជាយូរឆ្នាំណាស់មកហើយ ដោយមាន ដាំបន្លែចម្រុះជាច្រើនមុខ ដូចជា ត្រសក់ ស្ពៃក្តោប និងបន្លែជាច្រើនទៀត ខណៈបច្ចុប្បន្នអ្នកស្រីកំពុងដាំ និងប្រមូលផលខ្ទឹមបារាំង ដើម្បីលក់ ផ្គត់ផ្គង់តម្រូវការទីផ្សារ។
អ្នកស្រីបានអោយដឹងថា នេះជាឆ្នាំទី២ហើយ ដែលអ្នកស្រីចាប់ផ្តើមមុខរបរដាំដុះខ្ទឹមបារាំង ក្រោយទទួលបានការបណ្តុះបណ្តាលបច្ចេកទេស ពីមន្ទីរកសិកម្មខេត្ត និងគម្រោងអង្គការដៃគូនានា ដោយការដាំសម្រាប់លក់ជូនសមាគមន៍ និងទទួលបានតម្លៃជាមធ្យម៣០០០រៀលក្នុងមួយគីឡូក្រាម។
អ្នកស្រីបន្តថា ខ្ទឹមបារាំងជាដំណាំមួយប្រភេទ ដែលចំណាយពេលវេលាប្រមាណ៤ខែ ទើបអាចប្រមូលផលបាន និងជាដំណាំរើសរដូវកាល ក្នុងការដាំដុះ ដោយអាចចាប់ផ្តើមសាបព្រោះកូនបានចាប់ពីអំឡុងខែកញ្ញា ឬខែតុលា ហើយត្រូវលើករងដាំក្នុងខែបន្ទាប់។ អ្នកស្រីបន្តថា ការងារថែទាំវិញត្រូវប្រុងប្រយ័ត្នខ្ពស់ លើបញ្ហាដង្កូវបំផ្លាញដើម ដោយត្រូវពិនិត្យ មើលជាប្រចាំ ក្រោយពេលដាំដុះរួច។
សំឡេង៖ខ្ញុំដាំ១០រង ប្រហែល ២០ម៉ែត្រនោះមាន៤រង និង១០ម៉ែត្រមាន៦រង ១០រងទាំងវែងនិងខ្លីនោះ ខ្ញុំដាំអាក្រហមផង អាសផង ប៉ុន្តែពណ៌ក្រហមមើមចាញ់ពណ៌ស ប្រមូលបានជាង៦០០គីឡូ វាអត់ទៀងដែរជួនកាលឆ្នាំណាក៏ថ្លៃ ឆ្នាំណាក៏ថោក បាន៣០០០រៀល យើងដាំបើពេលសាបកូនយើងធ្វើរងសាបកូនរយៈពេល១ខែ រួចបានយើងធ្វើដីដាំទៅ យើងលើកជារងប្រហែលទទឹងមួយម៉ែត្រ ក្បួនគេឱ្យយើងដាំ៦ជួរ ពីជួរមួយទៅជួរ១គម្លាត១តឹកកន្លះ ហើយយើងរោយជីធម្មជាតិ ដូចជីអាចម៍គោ អាចម៍មាន់ ហើយយើងទ្រាប់បាតជីពីផ្សារបន្តិចៗទៅ រួចហើយយើងទ្រាប់ចំបើង រួចបានយើងដាំ ហើយយើងប្រើទុយោសាច វាដូចជាអត់សូវពិបាកដែរ ដូចថារាងនឿយពេលដាំបន្តិច មុនយើងដាំត្រូវធ្វើរងរាងយូរ ពេលដាំរួចដូចជាស្រួលទេ។ អ្នកស្រីបន្តថា បើកសិករណាចង់ចេះបច្ចេកទេសដាំដំណាំប្រភេទនេះ អ្នកស្រីស្វាគមន៍ក្នុងការចែករំលែកបទពិសោធន៍បន្ត ដើម្បីមានលទ្ធភាពដាំដុះទទួលបានជោគជ័យបង្កើនប្រាក់ចំណូលក្នុងក្រុមគ្រួសារ។
សូមជម្រាបថាខ្ទឹមបារាំង ជាប្រភេទរុក្ខជាតិបន្លែ ដែលត្រូវបានគេនិយមដាំ និងបរិភោគ។ ខ្ទឹមបារាំង មិនត្រឹមតែមានរសជាតិឆ្ងាញ់ប៉ុណ្ណោះទេ វាថែមទាំងផ្ដល់គុណប្រយោជន៍ច្រើន ចំពោះសុខភាពអ្នកបរិភោគថែមទៀតផង៕
