ខេត្តកណ្ដាល៖នាថ្ងៃអង្គារ ៤កើតខែចេត្រ ឆ្នាំឆ្លូវ ត្រីសក័ ពុទ្ធសរាជ ២៥៦៥ ត្រូវនឹងថ្ងៃទី៥ ខែមេសា ឆ្នាំ ២០២២
ឯកឧត្តម តាំង ម៉េងលាន អភិបាលរងខេត្តកណ្ដាល បានដឹកនាំកងកម្លាំង និងសិស្សានុសិស្ស ចុះធ្វើការសម្អាតសំរាម និងកំផ្លោក នៅតាមបណ្តោយសួនច្បារមាត់ទន្លេបាសាក់ ក្រុងតាខ្មៅ ដោយមានការចូលរួមដោយ អង្គការសម្អាតទន្លេ សមុទ្រ ដើម្បីលើកកំពស់សោភ័ណភាពទីក្រុង ត្រៀមអបអរក្នុងកម្មវិធីសង្ក្រាន្តខេត្តកណ្ដាល នាពេលឆាប់ៗខាងមុខនេះ ។
ក្នុងការចុះសម្អាតនេះ ឯកឧត្តម តាំង ម៉េនលាន បានតម្រូវឱ្យកម្លាំងទាំងអស់ ត្រូវរុញបោចកំផ្លោក និងប្រមូលសំរាមផ្សេងៗទៀតចេញឱ្យអស់ពីច្រាំងទន្លេ ព្រោះការងារអនាម័យបរិស្ថាននេះគឺជារឿងសំខាន់ណាស់ជាមុខមាត់របស់ខេត្ត ដូច្នេះកងកម្លាំងទាំងអស់ត្រូវសហការគ្នាសម្អាត ឱ្យបានរួចរាល់ឆាប់រហ័សបំផុត សំដៅលើកកម្ពស់សោភ័ណភាពតាមដងទន្លេ ត្រៀមសម្រាប់រៀបចំសង្ក្រាន្តខេត្តកណ្តាល ដើម្បីអបអរសារទរពិធីបុណ្យចូលឆ្នាំថ្មីប្រពៃណីជាតិខ្មែរ ឱ្យប្រព្រឹត្តទៅបានរលូន ប្រកបដោយសុភ័ណភាពស្អាត និងមានបរិស្ថានល្អផងដែរ។
នាឱកាសនោះដែរ ឯកឧត្តមក៏បាន អំពាវនាវដល់បងប្អូនប្រជាពលរដ្ឋទាំងអស់ ត្រូវចូលរួមថែរក្សាបរិស្ថានទាំងអស់គ្នា មិនត្រូវបោះចោលសំរាមពាសវាលពីកាល ពិសេសមិនត្រូវឱ្យមានសំរាមនៅក្នុងទឹកទន្លេ ព្រោះទន្លេមិនមែនជាធុងសំរាមនោះទេ ដូច្នេះយើងទាំងអស់គ្នាត្រូវទុកដាក់សំរាមឱ្យបានត្រឹមត្រូវ ដោយប្រជាពលរដ្ឋគ្រប់រូបត្រូវមានការទទួលខុសត្រូវក្នុងការទុកដាក់សំរាមនៅតាមផ្ទះនីមួយៗឱ្យបានល្អ។
សូមជម្រាបជូនផងដែរថា រដ្ឋបាលខេត្តកណ្ដាលនឹងរៀបចំសង្រ្កានខេត្តកណ្ដាលនៅក្រុងតាខ្មៅ ចាប់ពីថ្ងៃទី ១៤-១៥-១៦ ខែមេសា ក្នុងកម្មវិធីសង្ក្រាន្តនេះដែរ រដ្ឋបាលខេត្ត បានរៀបចំនូវកម្មវិធីជាច្រើនរួមមាន៖ កម្មវិធីតាមបែបសាសនា ពិធីក្រុងពាលី បួងសួងសុំសេចក្តីសុខ ពិធីចម្រើនព្រះបរិត្ត សូត្រមន្តលើករាសី របាំបួងសួង និងរបាំត្រុដ ពិធីទទួលទេវតាឆ្នាំថ្មី ពិធីពូនភ្នំខ្សាច់ ស្រង់ព្រះ។ ពិធីកម្សាន្តសប្បាយរួមមាន៖ កម្មវិធីលេងល្បែងប្រជាប្រិយខ្មែរ ចោលឈូង បោះអង្គុយ លាក់កន្សែង ទាញព្រ័ត ស្តេចចង់ ជាដើម ។ កម្មវិធីកីឡា មានការប្រកួតកីទ្បាជាច្រើនប្រភេទ រីឯក្នុងពេលរាត្រី មានកម្មវិធីសម្តែងសិល្បៈ រាំស្គរដី ការប្រគុំតន្ត្រីសម័យដោយមានការចូលរួមពីតារាល្បី អមជាមួយនិង ការបណ្តែតប្រទីបលើផ្ទៃទឹក បង្ហោះគោមលើអាកាស បាញ់កាំជ្រួច សួនថតរូបអនុស្សាវរីយ៍មានជាច្រើនទំរង់ ព្រមទាំងមានស្តង់លក់ផលិតក្នុងស្រុកជាច្រើនផងដែរ ។
