នៅថ្ងៃ ចន្ទ ទី១៨ ខែមេសា ឆ្នាំ២០២២ ក្រុមការងារសាខាកាកបាទក្រហមកម្ពុជាខេត្តស្វាយរៀង ដឹកនាំដោយលោកជំទាវ ដួង វណ្ណា ប្រធានកិត្តិយសសាខា លោកជំទាវ ពៅ សុភាព ហេរញ្ញឹកគណៈកម្មាធិការសាខា និងសហការី បានចុះសួរសុខទុក្ខ និងនាំយកអំណោយមនុស្សធម៌ យកទៅជួយសម្រាលការលំបាកដល់ប្រជាពលរដ្ឋ រងគ្រោះដោយសារខ្យល់កន្ត្រាក់កាលពីថ្ងៃទី ១៦ ខែ មេសា ឆ្នាំ ២០២២ បណ្ដាលខូចខាតផ្ទះប្រជាពលរដ្ឋ ក្នុងស្រុកកំពង់រោទិ៍ ចំនួន ១០ ខ្នង (ធ្ងន់ ១ ខ្នង មធ្យម ៩ ខ្នង) នៅឃុំព្រះពន្លា និងគ្រួសាររងគ្រោះដោយសារអគ្គីភ័យ ២ គ្រួសារ នៅឃុំ ញរ ១ គ្រួសារ និងនៅឃុំ ថ្មី ១ គ្រួសារ ។
អំណោយចែកជូនសម្រាប់គ្រួសាររងគ្រោះដោយសារខ្យល់កន្ត្រាក់ក្នុង ១ គ្រួសារទទួលបាន៖ អង្ករ ៣០ គ.ក្រ មី ១ កេស ត្រីខកំប៉ុង ១០ កំប៉ុង ទឹកស៊ីអ៊ីវ ៦ ដប កន្ទេលជ័របត់ ១ ឃីត ១ កញ្ចប់ (ភួយ,មុង,សារុង,ក្រមា) ថវិកា ៥ ម៉ឺនរៀល ដោយឡែកគ្រួសាររងគ្រោះធ្ងន់ទទួលបានសម្ភារបន្ថែមរួមមាន៖ ក្រណាត់កៅស៊ូតង់ ១ ធុងទឹកជ័រ ១ ឆ្នាំងបាយ-សម្លរ ២ និងថវិកា ២០ ម៉ឺនរៀល ។
សម្រាប់គ្រួសាររងគ្រោះដោយសារអគ្គីភ័យ ក្នុង ១ គ្រួសារទទួលបាន ៖ អង្ករ ៥០ គ.ក្រ ក្រណាត់កៅស៊ូតង់ ១ ធុងទឹកជ័រ ១ និងឆ្នាំងបាយ-សម្លរ ២ មី ១ កេស ត្រីខកំប៉ុង ១០ កំប៉ុង ទឹកស៊ីអ៊ីវ ៦ ដប កន្ទេលជ័របត់ ១ ឃីត ១ កញ្ចប់ (ភួយ,មុង,សារុង,ក្រមា) ថវិកា ៤០ ម៉ឺនរៀល ។
បន្ទាប់មកលោកជំទាវ និងក្រុមការងារ បាននាំយក អង្ករ ៥០ គ.ក្រ ថវិកា ៤៨ ម៉ឺនរៀល ចូលរួមរំលែកទុក្ខក្រុមគ្រួសារសពលោកស្រី សួន យ៉ាន ជាប្រជាពលរដ្ឋដែលមានជីវភាពខ្វះខាត នៅឃុំញរ ស្រុកកំពង់រោទិ៍ ស្លាប់ដោយសារសម្រាលកូន៕
