នាយករដ្ឋមន្ត្រីសិង្ហបុរី លោក Lee Hsien Loong បាននិយាយក្នុងសន្និសីទសារព័ត៌មានរួមគ្នាមួយជាមួយនាយករដ្ឋមន្ត្រីនូវែលសេឡង់ លោកស្រី Jacinda Ardern កាលពីថ្ងៃទី១៩ ខែមេសាថា ប្រទេសសិង្ហបុរី និងនូវែលសេឡង់នឹងធ្វើការងារជាមួយគ្នាយ៉ាងជិតស្និទ្ធបន្ថែមទៀតទៅលើវិស័យសេដ្ឋកិច្ចបៃតង និងការប្រយុទ្ធប្រឆាំងនឹងការប្រែប្រួលអាកាសធាតុ។
លោកនាយករដ្ឋមន្ត្រី Lee បាននិយាយថា វិស័យថ្មីនៃកិច្ចសហប្រតិបត្តិការនេះនឹងបើកការផ្តួចផ្តើមគំនិតថ្មីនៅក្នុងបច្ចេកវិជ្ជាផ្លាស់ប្តូរថាមពល ទីផ្សារកាបូន ការដឹកជញ្ជូន និងការគ្រប់គ្រងកាកសំណល់ប្រកបដោយចីរភាព ក៏ដូចជាវិស័យអាកាសចរណ៍ប្រកបដោយចីរភាព កិច្ចសហការអាជីវកម្ម និងភាពធន់នៃខ្សែសង្វាក់ផ្គត់ផ្គង់ផងដែរ។ វាក៏បានឆ្លុះបញ្ចាំងពីការប្តេជ្ញាចិត្តរួមគ្នារបស់ភាគីទាំងពីរក្នុងការសម្រេចបាននូវកិច្ចព្រមព្រៀងទីក្រុងប៉ារីសស្តីពីការប្រែប្រួលអាកាសធាតុ និងកិច្ចខិតខំប្រឹងប្រែងរួមគ្នារបស់ពួកគេក្នុងការចាប់យកឱកាសសម្រាប់កំណើនសេដ្ឋកិច្ចបៃតង។
បម្រែបម្រួលអាកាសធាតុ និងសេដ្ឋកិច្ចបៃតងនឹងក្លាយជាសសរស្តម្ភទី៥ នៅក្នុងភាពជាដៃគូរវាងប្រទេសសិង្ហបុរី និងនូវែលសេឡង់ ដែលត្រូវបានចុះហត្ថលេខាក្នុងអំឡុងពេលដែលលោកស្រីនាយករដ្ឋមន្ត្រី Ardern ទៅទស្សនកិច្ចនៅប្រទេសសិង្ហបុរីក្នុងឆ្នាំ២០១៩។
នៅក្នុងសន្និសីទសារព័ត៌មាននោះ លោកនាយករដ្ឋមន្ត្រី Lee ក៏បានទទួលស្គាល់អំពីវឌ្ឍនភាពនៃគំនិតផ្តួចផ្តើមរួមគ្នារវាងប្រទេសទាំងពីរ ហើយភាគីទាំងពីរក៏បានពិភាក្សាអំពីបញ្ហាអន្តរជាតិ និងក្នុងតំបន់ដែលជាកង្វល់រួមផងដែរ។ ពួកគេបានឯកភាពគ្នាទៅលើសារៈសំខាន់នៃស្ថាបត្យកម្មតំបន់ដោយការបើកចំហ និងមានការរួមបញ្ចូល ព្រមទាំងការគាំទ្រដល់តួនាទីស្នូលរបស់អាស៊ាន។ ពួកគេបានបង្ហាញនូវការគាំទ្រយ៉ាងខ្លាំងចំពោះច្បាប់អន្តរជាតិ និងគោលការណ៍នៃធម្មនុញ្ញអង្គការសហប្រជាជាតិ។
ក្នុងអំឡុងពេលនៃដំណើរទស្សនកិច្ចនៅក្នុងប្រទេសសិង្ហបុរីរបស់លោកស្រីនាយករដ្ឋមន្ត្រី Ardern ពីថ្ងៃទី១៨-២០ ខែមេសា ភាគីទាំងពីរគ្រោងនឹងចុះហត្ថលេខាលើអនុស្សរណៈនៃការយោគយល់គ្នាស្តីពីវិស័យអាកាសចរណ៍ប្រកបដោយចីរភាព ហើយពួកគេនឹងបង្កើតក្រុមការងារមួយស្តីពីខ្សែសង្វាក់ផ្គត់ផ្គង់៕(ប្រភព VNA បកប្រែដោយលោក យា ចិន្តាខន្តី)
