ខេត្តកំពង់ចាម៖បានចាប់ផ្ដើមចាក់វ៉ាក់សាំង កូវីដ ១៩ ដូសទី (ដូសជម្រុញ) ជូនដល់បុគ្គលិកសុខាភិបាលជួរមុខ និងគោលដៅអាទិភាព ក្រោមការដឹកនាំដោយផ្ទាល់ពី សំណាក់ឯកឧត្ដម ខ្លូត ផន ប្រធានក្រុមប្រឹក្សាខេត្ត និងឯកឧត្ដម អ៊ុន ចាន់ដា អភិបាល នៃគណៈអភិបាល ខេត្តកំពង់ចាម នាថ្ងៃទី០៩ ខែមិថុនា ឆ្នាំ២០២២ នេះ នៅសាលសន្និសីទសាលាខេត្តកំពង់ចាម ។
នាឱកាសនោះដែរ គេសង្កេតឃើញវត្តមាន ថ្នាក់ដឹកនាំ មន្ត្រីរាជការ មន្ទីរ អង្គភាព ស្ថាប័នក្នុងខេត្ត បានអញ្ជើញមក ដើម្បី ទទួលវ៉ាក់សាំងបង្ការជម្ងឺកូវីដ ១៩ ដោយស្ម័គ្រចិត្ត និងឥតគិតថ្លៃនេះ ពីក្រុមគ្រូពេទ្យជំនាញ ជាច្រើននាក់ ផងដែរ ។
សូមជម្រាបផងដែរថា សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ធ្លាប់បានធ្វើការអំពាវនាវ ដល់ប្រជាពលរដ្ឋ របស់ខ្លួន សូមបន្តទៅទទួលវ៉ាក់សាំងការពារជម្ងឺកូវីដ ១៩ ដើម្បី ការពារការឆ្លងចំពោះខ្លួនឯង និងក្រុមគ្រួសារ ក៏ដូចជា សហគមន៍ បើទោះបីជាពេលនេះ មិនមានការឆ្លង និងការស្លាប់ ខណៈពេលដែល នាបច្ចុប្បន្ន នៅកម្ពុជាយើង មានប្រជាពលរដ្ឋ សរុបប្រមាណជា ៩៤% បានចាក់វ៉ាក់សាំងកូវីដ ១៩ រួចហើយ ក៏ដោយ ។បើតាមសេចក្ដីជូនដំណឹង របស់រដ្ឋបាលខេត្តកំពង់ចាម បានជម្រាបជូនដល់ ឯកឧត្ដម លោកជំទាវ លោក លោកស្រី ថ្នាក់ដឹកនាំ មន្ត្រីរាជការរាជការ មន្ទីរ អង្គភាព ស្ថាប័នជុំវិញខេត្ត រដ្ឋបាលក្រុង/ស្រុក និងរដ្ឋបាលឃុំ/សង្កាត់ ព្រមទាំង បុគ្គលិកសុខាភិបាលជួរមុខ នៅក្នុងខេត្តកំពង់ចាម មេត្តាជ្រាបថា ៖ រាជរដ្ឋាភិបាលកម្ពុជា ក្រោមការដឹកនាំ របស់សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា បានអនុញ្ញាតឲ្យក្រសួងសុខាភិបាល បន្តចាក់វ៉ាក់សាំងកូវីដ ១៩ ដូសទី៥ ដូសជម្រុញបន្ថែមទៀត ដើម្បី បង្កើនភាពស៊ាំ នៅក្នុងសហគមន៍ ទប់ស្កាត់ការឆ្លងរីករាលដាល នៃជម្ងឺកូវីដ ១៩ និងជាពិសេស ដើម្បី បន្តបាននូវនិរន្តរ៍ភាព នៃដំណើរការជាប្រក្រតីភាព នូវការរស់នៅ រួមទាំងសកម្មភាពសេដ្ឋកិច្ច និងសង្គមកិច្ច និងធានាការពារអាយុជីវិតរបស់ប្រជាជន ពីជម្ងឺមហាប្រល័យកូវីដ ១៩ ។ អាស្រ័យ ដូចបានជម្រាបជូនខាងលើ សូមឯកឧត្តម លោកជំទាវ លោក លោកស្រី អញ្ជើញទៅទទួលវ៉ាក់សាំង ១៩ ដូសទី ៥ ដូសជម្រុញដោយឥតគិតថ្លៃ បន្ទាប់ពីបានទទួលការចាក់ ដូសទី ៤ ឬដូសមូលដ្ឋាន រយៈពេល ៣ខែ ឡើង នៅមន្ទីរពេទ្យបង្អែកខេត្ត មន្ទីរពេទ្យបង្អែកស្រុក និងបណ្ឌលសុខភាព ដែលនៅជិតលំនៅដ្ឋាន របស់បងប្អូនចាប់ពីថ្ងៃទី០៩ ខែមិថុនា ឆ្នាំ២០២២ នេះតទៅ ។
នោះ ក៏សូមក្រើនរំលឹកដល់បងប្អូនប្រជាជនទាំងអស់ ដែលអញ្ជើញទៅទទួលសាំងកូវីដ ១៩ ត្រូវចូលរួមអនុវត្តឲ្យបានខ្ជាប់ខ្ជួន តាមការណែនាំ របស់ក្រសួងសុខាភិបាល និងប្រកាន់ខ្ជាប់នូវវិធានការ «៣ការពារ និង ៣កុំ» ជានិច្ច ។ ព្រមជាមួយគ្នានេះដែរ ឯកឧត្ដម អ៊ុន ចាន់ដា អភិបាលខេត្តកំពង់ចាម ក៏បានសូមអំពាវនាវ ដល់បងប្អូនប្រជាពលរដ្ឋ មាតាបិតា និងអាណាព្យាបាល ដែលមានបុត្រធីតាអាយុចាប់ពី ៥ឆ្នាំ ឡើង សូមមកទទួលការចាក់វ៉ាក់សាំងកូវីដ ១៩ ដូសមូលដ្ឋាន ឬដុសជម្រុញដោយស្ម័គ្រចិត្ត និងឥតគិតថ្លៃ នៅតាមទីតាំងដែលរដ្ឋបាលខេត្តកំពង់ចាម បានរៀបចំ ដើម្បី បញ្ឈប់ការឆ្លងរាលដាល នៃជម្ងឺកូវីដ ១៩ នៅក្នុងសហគមន៍ ហើយជាមួយគ្នានោះដែរ ក៏សូមឲ្យបងប្អូនកាន់ភ្ជាប់ទៅជាមួយ នូវប័ណ្ណចាក់វ៉ាក់សាំង ឬលិខិតបញ្ជាក់ការចាក់វ៉ាក់សាំងកូវីដ ១៩ ផ្ទាល់ខ្លួន ផងដែរ ៕
