ខណ្ឌព្រែកព្នៅ៖នៅព្រឹកថ្ងៃអង្គារ ទី០៤ ខែមិថុនា ឆ្នាំ២០២៤ លោក ធឹម សំអាន អភិបាលនៃគណៈអភិបាលខណ្ឌព្រែកព្នៅ លោកអភិបាលរង ក្រុមការងារក្នុងខណ្ឌ លោកមេប៉េអឹប ខណ្ឌព្រែកព្នៅ លោកមេប៉ុស្តិ៍ នឹងប្រធានបញ្ជាការពារភូមិ បានដឹកនាំកម្លាំងអនុវត្តច្បាប់ ចុះរុះរើទីតាំងហាលត្រីប្រាហើមមួយកន្លែងរបស់ លោក លី ប្រៃ ដែលស្ថិតនៅតាមចញ្ចែមផ្លូវ១៥១ ភូមិសំរោងត្បូង សង្កាត់សំរោង ខណ្ឌព្រែកព្នៅ
ដែលមានការប៉ះពាល់ដល់ការអភិវឌ្ឍន៍ ប្រឡាយមេរំដោះទឹកភ្លៀងនារដូវវស្សា ដែលតែងតែ ជន់លិចធ្វើអោយបងប្អួនប្រជាពលរដ្ឋ ពិបាក់រស់នៅនិងធ្វើដំណើរប្រកបអាជីវកម្មនានា។
សូមបញ្ជាក់ថា កាលពីថ្ងៃពុធ ៨កើត ខែពិសាខ ឆ្នាំរោង ឆស័ក ព.ស.២៥៦៧ ត្រូវនឹងថ្ងៃទី ១៥ ខែឧសភា ឆ្នាំ២០២៤ រដ្ឋបាលខណ្ឌបានសេចក្តីជូនដំណឹង ដូចខាងក្រោម៖
ជម្រាបជូន លោក លី ប្រៃ អាស័យដ្ឋានផ្លូវ១៥១ ភូមិសំរោងត្បូង សង្កាត់សំរោង ខណ្ឌព្រែកព្នៅ
កម្មវត្ថុ៖សេចក្តីជូនដំណឹងស្តីពីការរុះរើរោងហាលត្រី នៅចំណុចក្រោយផ្ទះរបស់ លោក ដែលបានសាងសង់ នៅលើដីរបស់រដ្ឋ ស្ថិតក្នុងភូមិសំរោងត្បូង សង្កាត់សំរោង ខណ្ឌព្រែកព្នៅ យ៉ាងយូរត្រឹមថ្ងៃទី៣១ ខែឧសភា ឆ្នាំ២០២៤។
តបតាមកម្មវត្ថុខាងលើ រដ្ឋបាលខណ្ឌ សូមជម្រាបជូនថា ទីតាំងដែល លោក បានសាងសង់ រោងហាលត្រី គឺស្ថិតនៅលើដីរបស់រដ្ឋ និងជាតំបន់ដែលអាជ្ញាធរហាមឃាត់ការសាងសង់គ្រប់ប្រភេទ ព្រោះស្ថិត ក្នុងគម្រោងអភិវឌ្ឍន៍នាពេលខាងមុខ។ ការសាងសង់រោងហាលត្រី ដើម្បីប្រយោជន៍អាជីវកម្មផ្ទាល់ខ្លួនរបស់ លោក បានជះឥទ្ធិពលអវិជ្ជមាន ជាគំរូមិនល្អដល់ប្រជាពលរដ្ឋផ្សេងទៀត បង្ហាញពីការមិនស្តាប់ការណែនាំរបស់ អាជ្ញាធរ និងរាំងស្ទះដល់ការអភិវឌ្ឍ។ ដូចនេះ រដ្ឋបាលខណ្ឌ ស្នើឱ្យ លោក ស្ម័គ្រចិត្តរុះរើសដោយខ្លួនឯង រោងហាលត្រី និងសំណង់ផ្សេងទៀត ដែលគ្មានច្បាប់អនុញ្ញាតត្រឹមត្រូវ តាមពេលវេលាកំណត់ខាងលើ។ ហួសរយៈពេលកំណត់ រដ្ឋបាលខណ្ឌ នឹងចាត់វិធានការតាមផ្លូវច្បាប់ ដោយមិនទទួលខុសត្រូវលើការខូចខាត ទ្រព្យសម្បត្តិរបស់ លោក នោះឡើយ។អាស្រ័យហេតុនេះ សូម លោក ជ្រាប និងយកចិត្តទុកដាក់អនុវត្តអោយមានប្រសិទ្ធភាព។
នេះគឺសេចក្តីជម្រាបជូនមុនធ្វើការចុះរុះរើនេះ ដោយសារតែម្ចាស់មិនមានចំណាត់ការតាមដែលរដ្ឋបាលជម្រាបជូននឹងតាមពេលវេលាកំណត់ខាងលើ ទើបរដ្ឋបាលខណ្ឌដាក់កម្លាំងចុះរុះរើ។
ដូននេះសូមបងប្អូនរស់នៅ តាមចញ្ចែមផ្លូវជាតិលេខ១៥១ ជាដីរដ្ឋគ្មានច្បាប់អនុញ្ញាតទាំងអស់ដែលធ្លាប់បានទទួលសេចក្តីជូនដំណឹងឬជម្រាបជូន សូមប្រញ៉ាប់ រួសរាន់ទទួលយកនូវគោលនយោបាយរបស់រាជរដ្ឋាភិបាលក៏ដូចជាអភិបាលរាជធានីនឹងរដ្ឋាខណ្ឌ អោយបានឆាប់ ព្រោះយើងដឹងហើយថាពេលនេះជារដួវភ្លៀង កុំអោយមានការរាំងស្ទះដល់ការអភិវឌ្ឍន៍ ប្រឡាយរំដោះទឹក៕