សម្ដេចចៅហ្វាវាំង គង់ សំអុល អញ្ជើញនាំយកព្រះរាជអំណោយដ៍ថ្លៃថ្លា ចែកជូនកុមារកំព្រាចំនួន ១១៣នាក់ នៅក្នុងមជ្ឈមណ្ឌលកុមារកំព្រាចំនួនពីរកន្លែង ក្នុងខេត្តកំពង់ស្ពឺ

ព្រះករុណា ព្រះបាទសម្ដេចព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា សព្វព្រះរាជហឫទ័យ ប្រោសព្រះរាជទានព្រះរាជអំណោយដ៍ថ្លៃថ្លា តាមរយៈសម្ដេចចៅហ្វាវាំងវរវៀងជ័យអធិបតីស្រឹង្គារ គង់ សំអុល ឧបនាយកនាយករដ្ឋមន្ត្រី និងជារដ្ឋមន្ដ្រីក្រសួងព្រះបរមរាជវាំង ដើម្បីចែកជូនដល់ក្មួយៗកុមារកំព្រាចំនួន ១១៣នាក់ អ្នកគ្រប់គ្រង និងបុគ្គលិកបម្រើការចំនួន ៣០នាក់ នៅអង្គការបណ្តុះបណ្តាល និងថែរក្សាកុមារកំព្រា និងមណ្ឌលកុមារកំព្រាភូមិខៃស៍ នៃអង្គការឧបត្ថម្ភកុមារកំព្រា ក្នុងស្រុកភ្នំស្រួច ខេត្តកំពង់ស្ពឺ ក្នុងឱកាសទិវាកុមារអន្តរជាតិ ១មិថុនា ឆ្នាំ២០២១ ដោយមានការអញ្ជើញអមដំណើរពីឯកឧត្តម គុយ សុផល ឧត្តមប្រឹក្សាផ្ទាល់ព្រះមហាក្សត្រ និងជាទេសរដ្ឋមន្ត្រីទទួលបន្ទុកកិច្ចការទូទៅអមក្រសួងព្រះបរមរាជវាំង នាថ្ងៃទី០១ ខែមិថុនា ឆ្នាំ២០២១។